Impaganetget ti Office of Civil Defense (OCD) ti kinapateg ti panagibangon kadagiti pasdek ken rangtay kagiddan ti pangibagada ti posible a pannakarba ti lima gasut nga estruktura no mapasaran ti “The Big One” a gingined iti Pilipinas.
Iti maysa nga earthquake preparedness summit, kinuna ni OCD administrator Undersecretary Ariel Nepomuceno a dagiti “engineering solutions” a proactive ken preventive ti umuna a depensa ti pagilian no adda man mapasamak a napigsa a gingined.
Sigun kenni Nepomuceno, rumbeng nga awan ti shortcuts iti panangibangon kadagiti balay, pasdek, condominiums, opisina, hotel ken rangtay.
Naisayangkat ti dua nga aldaw a summit kasaruno ti magnitude 7.7 earthquake a napasamak idiay Myanmar idi Marso 28, a nakatayan ti nasurok 3,000 nga indibidual ken nakadangran ti ginasgasut a babbalay, templo ken pasdek.
Kabayatanna, sigun kenni Nepomuceno, dagiti estruktura a naibangonen ket kasapulan a masukimat iti regular babaen kadagiti propesional.
Patta-patta ti nasao nga opisial a posible a makapapatay iti 50,000 nga indibidual ken makadangran ti 162,000 a dadduma pay ti “The Big One.”
