BAGUIO CITY – Agtaltalinaed latta a natalged dagiti overseas Filipino workers (OFWs) nga agtatrabaho ita sadiay pagilian nga Israel iti baet ti agtultuloy ken manarimaan a rocket wenno missile attack sadiay nga isaysayangkat dagiti Islamic Jihad a nakabase sadiay Gaza a maysa a teritoryo ti Palestine.
Sigun kenni Vanessa Pagoli, caregiver sadiay Sderot a siudad sadiay Israel, kaarubada ti maysa kadagiti pagtaengan iti abagatan ti Israel a tinmamaan ti maysa kadagiti rocket nga impatayab ti militante a grupo ti Islamic Jihad sadiay Gaza.
Kinunana nga iti lokasyonna ket agarup kaaduan a babbalay ti addaan iti bukod a bomb shelter wenno natalged a silid a dagus a pagkamkamangan dagitoy no adda ti mapasamak a missile attack.
Pagyamyamananda met nga adda ti iron dome ti Israel a dagus a mangipatayab met kadagiti rockets a mangsabat dagiti missile nga ipatayab dagiti kalaban.
Dinakamatna a 90% kadagiti missile a naipatayab iti paset ti Southern Israel ket nasabat dagiti missile ti Israel nupay adda dagiti dadduma a timmama kadagiti babbalay ken iti kalsada.
Kinuna met ni Minda Ladawan Licawen, caregiver sadiay Jerusalem a natalgedda iti ayanda ngem adda latta ti marikriknada a panagdanag nangruna idi kalman a rumabiin ket tuluy-tuloy latta ti rocket attack.
Dinakamatna a no awan ti proteksiyon ti Namarsua iti Israel ket arigna maur-uram ita ti nasao a pagilian ken adun dagiti pimmusay.
Sigun iti Israel Defense Forces, aramidenda ti amin a kabaelanda tapnu masalwadan dagiti umili ken amin nga agnanaed ita iti pagilianda.
Kinuna pay ti Israel Defense Forces a ti kaudian a panagraut dagiti Islamic Jihad ket kas pammales iti panakapapatay ti lider dagitoy a ni Bahaa Abu Al-Ata ken ti asawa daytoy iti balligi nga air attack nga inyusuat ti Israel sadiay Gaza City.
Naamuan a ni Al-Ata ti senior commander ti Islamic Jihad sadiay Gaza ken responsable iti kaaduan a panagraut sadiay Israel manipud idi napalabas a tawen.
Iti agdama ket naka-red alert ti Israel Defense Forces kalpasan nga adda manen dagiti rockets a naipatayab paturong sadiay manipud Gaza ken agtultuloy ti panakaipauni ti air-raid sirens iti entero nga Israel.
