BAGUIO CITY – Sumagmamano kadagiti Pilipino nga agtatrabaho ita sadiay Israel ti makapaspasar ti trauma kagiddan ti agtultuloy a panagsinnukat ti rocket attack iti nagbaetan ti tropa ti Israel ken dagiti terorista sadiay Gaza a teritoryo ti Palestine.
Iti eksklusibo a panakiuman ti Bombo Radyo Baguio kenni Geoffrey Olayan, tubo ti Benguet ken agpapaay a caregiver sadiay Israel, imbinglayna nga adda ti aksion ti grupo dagiti OFWs sadiay tapno maaddaanda ti updates ken makikonektar kadagiti padada a Pilipino babaen iti panakitinnulongda iti Embahada ti Pilipinas sadiay Israel.
Kinunana a nangipaulog metten ti pakaammo ti embahada para iti panagridam dagiti Pilipino a mangmangged sadiay karaman dagiti nasurok 300 nga interns iti sitwasionda iti nasao nga insidente.
Iti baet daytoy, impatalgedna ti seguridad dagiti Pilipino sadiay gaputa dagos a mapakpakaamuan dagitoy babaen iti panaguni, panagalarma wenno panagsirena kadagiti cellphone-da a mangipasimudaag iti presensia dagiti rockets.
Ditoyda met nga agsagana nga agpakni kadagiti bomb shelters iti pasdek wenno balay nga ayanda para iti seguridadda.
Kinunana a saan a baro kadakuada ti nasao nga insidente gaputa kanayon a mapaspasaran daytoy sadiay.
Dinakamat pay ni Olayan nga iti 15 a tawen a kaaddana sadiay Israel ket arigna a normal kadakuada ti nasao a sitwasion.
Nupay kasta, imbinglayna a gapu iti agdama a sitwasyon sadiay ket napuyat dagitoy gapu iti saanda a pannagturog.
