BAGUIO CITY – Agparparikut itan iti pinansial ti dadduma a Pilipino sadiay Serbia gapu iti krisis a resulta ti COVID 19 pandemic.
Sigun ken ni Bombo International Correspondent Nikka Veronni Restovic, maysa a Pinoy sadiay Serbia, adda dagiti Pinoy sadiay a napukawan iti trabaho.
Kinunana a parikotda ita ti pinansial gapu ta maipatpatungpal sadiay ti “no work, no pay”.
Innayonna nga agtultuloy pay met ti trabaho ti dadduma a Pinoy sadiay Serbia ngem naksayan ti aldaw ti panagtrabahoda isut gapuna nga agkurangda iti pinansial.
Gapu iti daytoy, ur-urayen ita dagiti Pinoy sadiay Serbia no adda ti tulong ti gobierno ti Pilipinas a maipaay kadakuada.
Sigun pay kenni Restovic, agserserbi dagiti Pinoy sadiay Serbia kas household workers dagiti diplomats, bayat a ti dadduma ket negosiante ken addan dagiti nakiasawa sadiay kadagiti foreigners.
Iti agdama ket kinuna nga awan pay met ti damag no addan ti Pinoy sadiay Serbia a nakaptan iti COVID 19.
Dumanonen iti nasurok 6,600 dagiti positibo a kaso ti COVID 19 ken 125 dagiti pimmusay gapu iti nasao a virus sadiay Serbia.
