Impablaak ti lokal a gobierno ti siudad ti pannakaramid ti maysa nga online application a pangireportan dagiti umili dagiti napeggad a kasasaad a mabalin a mangitunda iti didigra.
Sigun kenni Charles Bryan Carame ti City Disaster Risk Reduction Management Office (CDRRMO), ti application ket maysa nga online hazard communication tool a panggepna a papartaken ti panagireport kadagiti napeggad a kasasaad para iti naparpartak a panagresponde manipod kadagiti responders.
Naawagan ti application kas LIGTAS wenno Local Incident Gathering Tool for Alerting Safety.
Kinuna ni Carame a mabalin a maipadamag iti LIGTAS dagiti insidente kas iti panagreggaay ti daga, saan a natalged a bakras, barado a kanal, nadadael nga utility post, natnag a kayo wenno aniaman a peggad iti LIGTAS, nga opisial a mairugi ita a bulan.
Iti kanito a maiyuswat ti nasao nga application, dagiti quick response (QR) codes ket maipablaak iti barangay halls, schools, ken parapubliko a pasdek para amin.
Kinuna ni Carame a ti LIGTAS ket agbalin nga avenue para iti komunidad tapno makiraman iti panangrisut kadagiti peggad iti aglawlaw ken pananglapped kadagiti didigra sakbay a mapasamak dagitoy.
