BAGUIO CITY – Nangrugin ti operasyon ti kaunaan a Minahang Bayan ditoy Cordillera Region a masarakan sadiay Itogon, Benguet.
Kasaruno daytoy ti panagkompleto ti Loakan Itogon Pocket Miners Association (LIPMA) kadagiti kaskenan a dokumento, nangruna ti small-scale mining contract tapnu mapalubusan ti panagminasda.
Iti panakiyuman ti Bombo Radyo kenni Daniel Pay-an, Board of Director ti LIPMA, kinunana a dumanon iti 500 a minero ti namnamaenda nga agmiyembro iti asosasyonda inton sumaruno a bulan.
Kinunana a makikoordinarda metlaeng kadagiti dadduma pay nga asosasyon dagiti minero sadiay Itogon para iti legal a panagminas dagitoy.
Maipalagip nga idi September 2018 ket indeklara ni DENR Secretary Roy Cimatu ti cease and desist order iti amin nga small-scale mining activities ditoy Cordillera Region kasaruno ti killer landslide iti mining community ti Ucab, Itogon, Benguet kabayatan ti panagdalapos ni Typhoon Ompong a nakapukawan ti adu a biag.
Nagresulta daytoy iti panakapukaw ti trabaho ti adu a minero a nangitunda met tapnu aprobaran ti Benguet Provincial Mining Regulatory Board ti 64-hectare a Minahang Bayan sadiay Itogon, Benguet tapnu agbalin a legal ti operasyon dagiti minero sadiay.
Linawlawagan met ti board a 20 hectares ti naipaay iti kontrata iti LIPMA isut gapuna a mabalin nga agaplikar pay dagiti dadduma nga interesado nga small-scale mining groups sadiay Itogon.
Maur-uray met ita ti panangaprobar ni Cimatu iti pito pay nga aplikasyon para iti Minahang Bayan iti rehiyon Cordillera.
