BAGUIO CITY–Imbasura ti LTFRB-Central Office ti petisyon a mangkonkontra iti panakaipalubos ti 200 a kanayunan a baro a taxi unit ditoy siyudad ti baguio ken Cordillera.
Maibasar iti desisyon ti LTFRB central office idi Enero 29, 2021 a pinirmaan ni LTFRB Board Chairman Atty. Martin Delgra, naduktalan ti board nga awan ti rason tapno saan a maipatungpal ti pammilin dagitoy a nangilukat iti baro nga aplikasyon iti prankisa iti taxi.
Impalawag pay ti LTFRB a saanda a pinatgan ti immuna a kiddaw a maipaayan pay iti gundaway dagiti taxi owners nga addaan iti expired franchise a mangi-renew kadagitoy agsipud ta maibasar iti pagalagadan ti ahensiya, amin nga nagpaso a CPCs wenno prankisa sipud pay Disyembre 2012 ket maideklara a kanseladon a mangiluklukat iti baro nga aplikasyon.
Sigun pay iti LTFRB, panggep ti panakailukat ti baro nga aplikasyon iti prankisa a mapunuan dagiti 183 a units a nagpason ti prankisada gapu iti pagkasapulan iti taxi units ditoy siyudad.
Impetteng pay ti ahensiya a naipatungpal ti umno a konsultasyon iti nasao a banag a dinar-ayan dagiti amin a maseknan a pakairamaman dagiti opisyal ti lokal a gobyerno ti siyudad ti Baguio iti naglabas ken agdama nga administrasyon.
Gapu iti daytoy, kinuna ti ahensiya a mabalin nga ituloy ti LTFRB-COrdillera a mangiproseso iti aplikasyon iti taxi services iti ini-inut ken nainkalintegan a wagas kas maitunos iti agdama a covid-19 pandemic. (Bombo Alfred Pudsoc)
