Agtultuloy latta ti panagpalagip dagiti otoridad iti publiko nga agannad dagitoy kasaruno ti nailista ti City Health Services office a maikapat a kaso ti mpox iti siudad ti Baguio.
Gapu iti dayta, makipagtrabtrabaho dagitoy iti City Tourism Council, Hotel and Restaurant Association of Baguio ken kadagiti high-foot-traffic establishments pakairamanan dagiti accommodation providers, food businesses, spas, gyms, salons, laundry shops, ken transport hubs a mangipatungpal dagitoy iti precautionary measures.
Iti baet dayta, impasigurado dagiti Panagbenga organizers iti publiko a maituloy latta dagiti festival activities babaen iti pannakikoordinarda iti health authorities ken kadagiti event organizers tapno maipasigurado ti seguridad dagiti dumar-ay iti nasao a festival.
Kagiddan dayta, impaganetget dagitoy ti panangipractice iti good hand hygiene babaen iti panagbuggo iti ima, liklikan ti close skin-to-skin contact kadagiti dadduma nga indibidual, ken agaramat iti long sleeves tapno maprotertaran.
Malaksid metlaeng iti dayta, agpacheck-up a dagus no adda ti marikna a sintomasna kas iti panateng, sakit ti bagbagi, rashes ken saan a rumuar iti pagtaengan no saan a nasayaat ti salun-at.
Maal-allukoy pay dagiti bisita ken residente nga agbalin a nariman ken suruten dagiti pammilin dagiti pagalagadan dagiti otoridad.
Makidkiddaw metlaeng ti kooperasyon ti tumunggal maysa tapno maliklikan ti nasao a sakit.
