BAGUIO CITY – Nakumpiskar dagiti otoridad ti P18.48-M a gatad dagiti marijuana bayat a natiliwda ti tallo nga indibidual a nangibiahe kadagiti nasao a kontrabando iti interdiction/checkpoint operation nga insayangkat dagitoy sadiay Sitio Ampawilen, Poblacion, Sadanga, Mountain Province idi parbangon, October 13, 2021.
Nabigbig dagiti natiliw a da Jorge Tomaldong Eyawon, 34-anyos; Dario Di-wean Diway, 23-anyos ken Jake Caesar Bulosan Linchangan, 19-anyos, bin-ig a residente ti Cudal, Tabuk City, Kalinga.
Naamuan a dagiti tallo ket high value individuals.
Nakumpiskar manipud kadagitoy ti 148 a bricks dagiti napagango a bulbulong ti marijuana ken 6 a tubular form dagiti napagango a bulbulong ti marijuana.
Dagiti kontrabando ket addaan pakabuklan a dagsen nga agarup nasurok 154 kilograms ken gatad nga P18.48-M.
Nakumpiskar pay ti kotse nga inaramat dagitoy iti panangibiaheda kadagiti kontrabando, pakairamanan ti sumagmamano a drug paraphernalia ken cellphones.
Ti operasyon ket resulta ti nairtengan a kampanya kontra iti iligal a droga.
