BAGUIO CITY – Impetteng ni Baguio City Mayor Benjamin Magalong a saan a ghost project ti naaramid a flood control project iti creek boundary ti Sto. Niño ken Interior Kit, Bakakeng Central, asideg iti Malecdan Residence.
Maibasar iti official statement a naipablaak iti social media page ni Mayor Magalong, dinakamatna a nairugi ti konstruksyon ti P2.4 million ti gatadna a flood control project idi March 17, 2025 agingga idi Hunyo 6, 2025.
Ti implementing agency ti nasao a proyekto ket ti City Engineering Office ken LGU-Baguio bayat a ti kontraktor ket ti Capable Builders.
Kinuna ni Mayor Magalong a nakompleto ti kontruksyon ti flood control project ken saan daytoy a ghost project.
Rimwar daytoy nga statement ti Mayor tapno makorektar ken malawlawagan dagiti agwarwaras a komento iti social media a mangibagbaga nga adda ti anomalya iti nasao a proyekto.
Impetteng ti Mayor nga amin a dokumento ti nasao a proyekto ket mabalin a kitaen ti publiko.
Inkarina nga agtultuloy ti panangitakderna iti kinapudno ken bigbigbigenna dagiti nasayaat a proyekto a mangipaay iti natalged a komunidad para kadagiti maseknan nga umili.
