Dumanonen iti agarup P2.63 Billion ti gatad ti agricultura a nadadael gapu iti epekto ti El Nino sigun iti Department of Agriculture.
Maibasar iti datos ti nasao nga ahensia, sangapulo a region iti pagilian ti naapektaran pakairamanan ti Cordillera Administrative Region, Ilocos Region, Cagayan Valley, Central Luzon, Calabarzon, MIMAROPA, Bicol Region, Western Visayas, Zamboanga Peninsula ken Soccsksargen a nangapektar kadagiti 54,203 a mannalon iti nasao a rehion.
Kabayatanna, dagiti produkto a pagay ti kangrunaan a naapektaran a dumanon iti P1.72 billion total value loss, kasaruno ti mais nga addaan ti P591.74 million value losses, high-value crops a dumanon iti P326.68 million ken ti livestock sub-sector, partikular kadagiti manok, baka, carabao, ken kalding a dumanaon iti P59,600.
Sigun iti iti nasao a departamento, manamnama a maipaay ti P1.08 Billion a pakabuklan a tulong kadagiti naapektaran a rehion ken agtultuloy ti pannakikoordinarda kadagiti maseknan nga opisina, para iti naparpartak a pannakaipaay ti tulong pinansial kadagiti apektado a mannalon iti pagilian.
