BAGUIO CITY – Dinadael ti nagtipon a pwersa ti PNP ken PDEA ti rinibribo a puon ti marijuana ken napagango a bulbulong ken tultulang ti marijuana iti dua nga aldaw nga eradication operation dagitoy sadiay Tinglayan, Kalinga.
Nadiskobre dagiti iligal a mula manipud iti 10 a disso sadiay Barangay Loccong.
Pinarut ken inuram dagiti otoridad ti 87,950 a puon ti marijuana nga aggatad ti P17.59-M ken inramanda nga inuram ti nadiskobreda a 22 a kilo ti napagango a bulbulong ken tultulang ti marijuana nga addaan ti fruiting tops nga aggatad ti P2.64-M.
Pakabuklan a P20.23-M ti gatad dagiti maiparit a mula a nadadael iti operasyon a naawagan ti OPLAN 20 Awilit.
Nupay kasta, awan ti cultivator a natiliw kabayatan ti operasyon.
Sagudayen ti Republic Act 9165 wenno ti Comprehensive Dangerous Act of 2002 a maiparit ti panagmula ken panagaywan ti marijuana.
