Imbutaktak ni Senator Risa Hontiveros a nagbayad iti P200 million ni dismissed Bamban, Tarlac Mayor Alice Guo ken ti dua a kabsatna tapno makapanawda iti pagilian a Pilipinas a saan a maduktalan ti Bureau of Immigration ken law enforcement agencies.
Imbutaktak ni Hontiveros ti nasao nga impormasyon bayat ti hearing iti Senate subcommittee on justice tapno maduktalan nu sino ti nangtulong kenni Guo a makalibas.
Immunan a nakaunget ni President Ferdinand Marcos Jr. idi naammoanna ti napasamak nu sadino binallaaganna dagiti nangtulong kenni Guo.
Inaklon met ni Shiela Guo, kabsat ni Alice Guo iti hearing a nagaramatda ti bangka tapno makaruarda iti pagilian
Maipalagip a natiliw ni Shiela ken ti maysa pay a kadwana idiay Indonesia itay nabiit.
Patien met dagiti otoridad ken opisyal nga adda pailaeng ni Alice Guo idiay Jakarta, Indonesia kas maibasar iti koordinasyonda iti gobyerno ti Indonesia.
Iti agdama ket agtultuloy ti koordinasyon ti Philippine Government kadagiti otoridad idiay Indonesia para iti pannakatiliw ni Alice Guo.
