Rugianen ti Department of Social Welfare and Development (DSWD) ti agiwaras iti P2,000 a cash assistance inton sumaruno a lawas.
Maipaay daytoy kadagiti 7.5 million a benepisiario ti napalawa nga Unified Package for Livelihoods, Industry, Food, and Transport (UPLIFT) program.
Sigun kenni DSWD Secretary Rex Gatchalian, nabingay iti tallo a grupo dagiti umawat iti tulong.
Buklen ti Group 1 ti 3.5 a million a Pilipino a nakaraman iti Pantawid Pamilyang Pilipino Program (4Ps) ken Walang Gutom Program (WGP), bayat a Group 2 dagiti 2.5 million nga indibidual a saan a paset ti programa ti 4Ps ngem karaman iti poor ken near-poor a naibasar iti Philippine Statistics Authority’s (PSA) 2024 Community-Based Monitoring System (CBMS).
Kabayatanna, buklen ti Group 3 dagiti 1.5 million a low-income Filipinos nga addaan iti Social Security System (SSS) accounts.
Sigun kenni Gatchalian, dagus a maawat ti Group 1 ken 3 ti financial aid agsipudta direkta a maideposito iti account dagitoy.
Para iti Group 2, mangrugi ti manual payouts, validation, ken digital account enrollment inton sumaruno a lawas.
Iti sidong ti nasao a programa, maminsan laeng nga umawat dagiti benepisiario ti 4Ps ken WGP bayat a dagiti near-poor ken lower-middle-income households ket umawatda iti las-ud ti innem a bulan manipud Hulio agingga Disiembre.
Panggep ti programa a salakniban dagiti nalaka a maapektaran iti “energy emergency ken dadduma pay.
