BAGUIO CITY – Sumangsangon iti kaso a panaglabsing iti Comprehensive Dangerous Drug Act of 2002 ti dua nga indibidual kalpasan a nakumpiskar kadakuada ti dua a botelya ti marijuana oil idi malem ti Martes, March 16.
Nabigbig dagitoy a da Nelson Collasit Banson, 38-anyos, driver, residente ti Calagdao, Bulanao, Tabuk City ken Flores Balnao Maguilao, 21-anyos, residente ti Tulgao West, Tinglayan, Kalinga.
Maibasar iti report, dagus a nangisayangkat dagiti otoridad iti checkpoint/interdiction operation sadiay Ampawelin, Poblacion, Sadanga, Mountain Province kalpasan a nakaawatda iti report iti maatap a panakaibiahe ti iligal a droga.
Kabayatan ti checkpoint operation ket pinara dagiti otoridad ti maysa a motorsiklo nga awanan ti plaka nga imanmaneho ni Banson.
Nakita met dagiti otoridad ti dua a botelya a naglaon ti maatap a marijuana oil nga aggatad ti P21,000 kabayatan ti panangsukimatda kadagiti dokumento ti motorsiklo.
