BAGUIO CITY – Dumanon iti P3.4-M ti idonar ti Police Regional Office Cordillera (PROCOR) kadagiti indibidual a naapektaran iti bagyo nga Ulysses sadiay Cagayan Valley ken Bicol Region.
Naur-or ti nasao a gatad manipod iti donasyon dagiti pulis iti rehion iti tarigagayda a matulongan met dagiti naapektaran iti dimmalapos a bagyo.
Naamuan a P535,910 ti nagtaud kadagiti pulis sadiay Abra; P157,200 kadagiti pulis sadiay Apayao; P509,400 kadagiti pulis iti Baguio City ken P532,500 kadagiti pulis iti Benguet.
Nagtaud met ti P320,200 kadagiti pulis sadiay Ifugao bayat a P405,900 kadagiti pulis sadiay Kalinga ken P283,000 kadagiti pulis sadiay Mountain Province.
Nagdonar met dagiti kameng ti Regional Mobile Force Battalion iti P297,500 bayat a nasurok P249,000 ti donasyon dagiti personnel ti Regional Headquarters ken P116,410 manipod kadagiti regional support units.
Naamuan a daytoyen ti maikatlo a gundaway a nangisayangkat ti PROCOR iti Bayanihan Fund Challenge, no sadino, iti umuna a gundaway ket nakaurnongda ti dumanon P117-M iti sidong ti Kapwa Ko, Sagot Ko Program bayat a dumanon met iti P4.1-M iti sidong ti Sadanga Footbridge Challenge.
