Ipaayan ni Presidente Rodrigo Duterte iti P30,000 a gunguna ti tunggal indibidual a makaipaay ti impormasyon seknan kadagiti opisyales nga agaramid iti korapsion mainaig kadagiti tulong nga ipapaay ti gobyerno kabayatan ti krisis gapu iti COVID-19 pandemic.
Sigun kenni presidential spokesperson Harry Roque, ti panakaipaay ti gunguna ket bunga ti tarigagay ti presidente a maisardeng ti panagkorakot iti social amelioration program (SAP) ken dadduma pay a tulong ti gobyerno kadagiti apektado nga umili.
Kinunana a dagiti agireport kadagiti korap nga aramid dagiti opisyales ti gobyerno mainaig iti pondo ti SAP ket mabalin nga itawagda iti 8888 ken ipaayda dagiti kaskenan nga impormasyon.
Innayonna a maitunos ti addang iti zero tolerance ni Presidente Duterte kontra iti korapsyon nangruna dagiti manggungundaway ken mangkorkorakot iti tulong pinansial para kadagiti marigrigat.
