BAGUIO CITY – Dinadael ti nagtipon a pwersa dagiti panakabagi ti linteg ti P40.78-M a gatad ti marijuana iti uppat nga aldaw nga eradication operation nga insayangkatda iti Mount Chumanchil sadiay Barangay Loccong, Tinglayan, Kalinga.
Naisayangkat ti operasyon iti sidong ti Oplan Firefly ti pulisya a nangrugi idi May 6 ken nagleppas idi kalman, May 9, 2021.
Nadiskobre dagiti otoridad ti tallo a pagmulaan ti marijuana nga addaan pakabuklan a kalawa a 8,900 square meters.
Pinarut ken inuram dagiti otoridad ti pakabuklan nga 88,400 a pinuon ti marijuana, 165 a kilo dagiti napagango a bulong ti marijuana, 15 a kilo dagiti tulang ti marijuana ken 60 a kilo ti bukel ti marijuana.
Nupay kasta, awan ti natiliw a cultivator iti nasao nga operasyon.
Iti baet daytoy, inkari dagiti otoridad ti panangituloyda kadagiti isaysayangkatda a marijuana eradication operations tapnu madalusan dagiti drug-affected areas a lugar iti Cordillera Region a maitunos metlaeng iti drug war ti gobyerno.
