Ka-Bombo, anya kadi ti umno a sweldo para kadagit fresh graduates?
Ita a panawen, saan a nalalaka ti agbirok iti trabaho nangruna kadagiti kalkalpasna ti panagadalna.
Sumagmamano a fresh graduates ket kasapulanda pay a mastand-by sakbayda a makastrek iti posisyon wenno trabaho.
Mamingsan, kasapulan pay ti endorsement dagiti daduma nga indibidual weno ti kunada a backer.
Ngem, ammo yu kadi a maysa a fresh graduate ti makaaw-awat iti nagduduma a reasksyon maipapan iti pablaakna iti social media gapu ta saan daytoy a napnek iti P40-K a sweldo a naidiaya kenkuana kas starting salary.
Sigun iti fresh graduate, nababa ti sweldo a P40-k kasta met a saan daytoy nga umdas a maibayad kadagiti ado a puyat ken sakripisyona bayat ti panagadalna.
Gapu iti dayta, kinuna dagiti daduma a netizens a ti P40-K nga starting salary ket dakkel a banag agsipud ta dagitoy ket nangrugi iti sweldo a P14-K.
Daduma kadagiti netizens ti nangisuhestion met a nu panggepna ti dakkel a sweldo ket agturong daytoy iti ballasiw taaw.
Bueno, para kenka ka-Bombo, anya ti rumbeng nga starting salary dagiti baro iti trabaho?
