BAGUIO CITY – Matuloy a mapaikkat dagiti pagtagilakuan ti chicken dung wenno abonoan sadiay La Trinidad, Benguet partikular iti Barangay Shilan ita a bulan.
Iti interview ti Bombo Radyo, kinuna ni Mayor Romeo Salda nga idi pay koma napan a bulan ti naituding nga umikkatan dagiti negosyante ngem nagkiddaw dagitoy ti pawayway.
Impetteng ni Salda a nasken nga agbiruken dagiti chicken dung traders ti umakaranda iti ruar ti municipyo gaputa naipayaan metten dagitoy ti naan-anay nga oras.
Inlawlawag ti opisyal nga awan ti ordinansa ti La Trinidad a mangipalpalubos iti panaglako ti abono iti masakupanna a municipyo.
Sigun pay kenni Mayor Salda, saan nga agbaybayad dagiti chicken dung traders ti buwis iti municipyo.
Immunan nga inreklamo dagiti maseknan nga umili ti saan a nasayaat nga angot nga agtataud iti paglaklakoan ti abono.
Malaksid sadiay La Trinidad, adda metlaeng ti aglaklako ti chicken dung sadiay Tublay, Benguet ngem adda ti ordinansa ti nasao a municipyo a mangipalpalubos iti panaglako ti abono.
