BAGUIO CITY – Naiyusuat sadiay Tadian, Mountain Province ti Pagkaing Pangseguridad Para sa Lahat wenno ng PAGPAPALA Project ti 1502nd Maneuver Company ti Regional Mobile Force Battalion (RMFB) – 15 ti Police Regional Office Cordillera iti koordinasyon ti Department of Agriculture – Cordillera, 4Ps Office ti DSWD ken ti Tadian Municipal Agriculture Office.
Paset daytoy ti panakitinnulong ti nasao a unit ti pulisya tapnu maipadanun kadagiti nasusulinek a lugar iti Mountain Province nga addaan ti presensia dagiti armado nga elemento ti kalaban ti gobyerno dagiti maiparbeng ken pagkasapulan a serbisyo para iti pagsayaatan ken panagdur-as dagiti umili.
Sigun iti pulisya, iti PAGPAPALA Project ket nagiwarasda kadagiti bukel ti nagduduma a nateng kadagiti residente ti Tadian para iti nabaybayag a suplay ti taraon.
Tarigagay ti proyekto a maital-o ti backyard ken urban gardening a mabalin a pagtaudan ti sadiwa a taraon dagiti pamilya ita nga adda ti mapaspasaran a pandemya gapu iti COVID-19.
Dumanon metten iti 250 a benipisaryo ti 4Ps iti uppat a barangay ti Tadian ti nakaawat dagiti naiwaras a bukel ti nagduduma a nateng, no sadino, binulan a mamonitor dagitoy tapnu maipasigurado ti panagballigi ti proyekto.
Puntirya pay dagiti otoridad a maipaayan iti bukel ti nagduduma a nateng dagiti amin a 19 a barangay ti Tadian, Mountain Province.
