Impetteng ti Philippine Navy nga igaggagara ti China a pagpungtuten ti Pilipinas babaen iti iligal nga aktibidad nga ipatpatungpalda iti West Philippine Sea tapno mapilitan dagiti suldado a Pilipino nga umuna nga agpaputok ti paltog.
Iti baet daytoy, kinuna ni Philippine Navy spokesperson for the West Philippine Sea Commodore Roy Vincent Trinidad a saanda a tutupan ti saan a naikalintegan a wagas ti China a lumaban.
Maipalagip a nadangran dagiti pito a soldado ti pagilian nu sadino maysa kadagitoy ti naputedan ti ramay bayat ti rotation ken resupply mission dagitoy idiay Ayungin Shoal.
Daytoy ket kalpasan a dinarup dagiti Chinese Coast Guard dagiti inflatable boat ti Pilipinas ken inalada ti armas dagiti soldado.
Impaganetget ni Trinidad a maitunos iti linteg dagiti amin nga ar-aramiden nga aksyon ti Pilipinas a mangidepensar iti soberanya ti pagilian.
Inkarina ti opisyal nga agaramidda ti baro a paggannurotan tapno maipasigurado nga awan ti Pilipino a madangran kadagiti iligal ken agresibo nga aksyon ti China.
