Mangnamnama ti pamilya ti beauty pageant contestant Geneva Lopez ken ti fiance daytoy a ni Yitshak Cohen a mabirukan a dagus dagitoy kalpasan ti dua a lawas a panakapukawda.
Nakikoordinar metten ni Yanic Cohen, kabsat ni Yitshak kasta met ti kabsat ni Geneva iti National Bureau of Investigation (NBI) para iti tulong dagitoy.
Sigun kenni Yanic, awan ti naibagbaga ti kabsatna a pangta iti biyag daytoy iti naudi a panagsaritada.
Kinuna pay ni Yanic a panggepna a bisitaen ti pagilian a Pilipinas inton summer tapno imatangan ti kinapintas ti pagilian nu pay kasta saanna a namnamaen a ti panagbisitana gayam iti Pilipinas ket para iti panakabirok ti kabsatna.
Nu pay kasta, agyamyaman daytoy iti law enforcement ti pagilian gapu iti panagregget dagitoy a mangsapul iti kabsatna.
Kabayatanna, nangipaayen ti statement ni Brandon, ti real estate consultant a naudi a nakakita kadagiti aggayyem.
