BAGUIO CITY – Tarigagay ti lokal a gobyerno ti Tineg, Abra nga agkiddaw iti public apology dagiti adda iti likodan dagiti ladawan ti uppat a lalaki a nagpaala ti ladawan a lamolamo sadiay Apao Rolling Hills.
Nailanad daytoy iti official statement ni Tineg Mayor Corinthia Crisologo seknan iti nasao nga isyu.
Sigun kenkuana, saan nga acceptable, disgraceful ken offensive kadagiti residente ti munisipyo ti nasao a post iti social media nangruna ta paset ti ancestral domain ti nasao a disso.
Nupay saan a kwestionable ti panag-paala dagiti uppat nga indibidual iti ladawan a lamolamo, impetteng dagiti maseknan a residente a ti inaramid dagiti uppat ket kaawan respeto ti panang-aramatda iti kinapintas ti Apao Rolling Hills kas backdrop.
Innayonda a ti inaramid dagiti uppat ket panangipakita iti saan a panangrespeto iti konserbatibo a kultura ken tradisyon ti ili.
Impetteng ni Mayor Crisologo a mangrugrugi paylaeng ti panagdur-as ti turismo ti ilida isut gapuna a ti nasao a kita ti aramid ket maka-apekto iti tarigagay dagitoy.
Naikkat metten ti nasao a post manipud iti account ti netizen a ni Ley Benabese kalpasan a nakaawat iti nagduduma a pammabalaw.
Iti social media account ni Benabese, nagkiddaw manen daytoy iti dispensa kenni Mayor Crisologo ken kadagiti umili ti Tineg.
Kinunana nga awan ti intensionda a bastosen ti maysa a tourist spot ken ti inaramidda ket paset laeng ti linnangayda nga agkakadwa.
Innayonna a dakkel a leksion ti naadalda iti napasamak ken saandan nga uliten ti nasao a biddut.
Nupay kasta, awan pay ti waragawagda seknan iti kayat ti lokal a gobyerno a panag-public apology dagitoy.
