Impeksa ni Kapitan Joel Omar ti Barangay Campo Filipino ti siudad ti Baguio nga iti panagleppas ti Ramadan iti aldaw ti Eid al-Fitr ket rumbeng nga agtalinaed kadagiti kakabsat a Muslim dagiti adal a naamoanda.
Iti panakiuman ti Bombo Radyo kenni Omar, kinunana a rumbeng nga itultuloy dagiti Muslim ti panagaramid dagitoy ti nasasayaat nga aramid, ti panangliklikda iti panangibalikas kadagiti nangkakamadi a panagsasao ken ti saanda a panagsubli kadagiti bisyo dagitoy.
Sigun kenni Omar, ti Eid al-Fitr ket maysa kadagiti kaimportantean a pillars ti Islam gapu ta daytoy ti maikappat iti nasao a pillar, ti panawen ti panag-aayunar.
Dagiti daduma a pillar ket ti panangiyebkas ti pammati, ti panagkararag ti inaldaw, ti mandatoryo a charity, ken ti pilgrimage.
Kinuna ni Omar a ti Eid al-Fitr ket maysa kadagiti kadakellan a selebrasyon dagiti Muslim gapu ta daytoy ti panawen nga amin dagiti Muslim iti sangalubongan ket ramrambakanda ti panagleppas ti panag-ayunarda.
Iti panagleppas ti Ramadan, sumaruno ti panagkakadwa dagiti kameng ti pamilya ken ti panagraragsak dagitoy gapu ta kalpasan ti makabulan a panag-aayunar wenno panagrigat ket panawen met tapno agragsak.
Kabayatanna, iti naipatungpal nga Eid al-Fitr iti siudad ti Baguio, mapatta-patta a rinib-ribo ti nakipaset iti daytoy bayat a kinuna ti nasao a kapitan a tinawen nga umad-adaddo dagiti makipaspaset iti Eid al-Fitr iti siudad ti Baguio nangruna dagiti agtaud sadiay Pangasinan, Ilocos, La Union ken daduma pay a probinsiya gapu ta addaan ti siudad ti klima a saan unay a nabara ken apag-eksakto a holiday daytoy, panawen tapno agbisita dagitoy kadagiti nagduduma a tourist destinations ti City of Pines.//Bombo Mera Pacpacan
