BAGUIO CITY – Agtultuloy ti panagbaba ti kaso ti COVID-19 iti probinsia ti Benguet.
Impannakkel daytoy ni Governor Melchor Diclas iti panakiuman ti Bombo Radyo Baguio kagiddan ti panangkunana a dumanon laengen iti 15 ti aktibo a kaso ti nasao a sakit iti masakupan ti probinsia.
Kinunana a nawaya itan dagiti ospital ken dagiti isolation facilities.
Impeksana pay ti inanamana nga agtultuloyen ti nababa a kaso ti COVID-19 sadiay Benguet.
Imbinglay pay ni Governor Diclas nga agtultuloy ti panakabakuna dagiti umili iti probinsia ngem agdepdepende daytoy iti panagsangpet ti bakuna.
Pinagyamananna met ti sumaysayaat a panangakseptar ti publiko iti bakuna kontra iti COVID-19 gapu iti umad-adu a bilang dagiti umili ti Benguet a mangkayat a mabakunaan kontra iti nasao a sakit.
