BAGUIO CITY – Saan a mandatory ti panagbakuna kontra COVID-19 kadagiti mannursuro ken estudyante a panggepda a makipaset iti face to face classes.
Iti interview ti Bombo Radyo Baguio, kinuna ni CHED Cordillera-Regional Director Demetrio Anduyan Jr., a saan nga mandatory ti panagbakuna ngem maiyaw-awis daytoy tapnu nataltalged dagiti estudyant ken personnel a makipaset iti face to face classes gapu iti agtultuloy a pandemya.
Inyunay-unayna met kadagiti Higher Education Institutions wenno dagiti unibersidad ken pagadalan a saan a nasken a pwersado ti panagbakuna dagiti estudyante gaputa adda ti pammilin ti gobierno seknan iti daytoy.
Kinuna a saan met a parikot ti vaccination rate iti rehiyon gaputa agtaltalinaed ti Cordillera nga addaan iti kangatoan a bilang ti estudyante a nabakunaan manipod kadagiti HEIs iti intero a pagilian.
Iti kaudian nga datus dagitoy, 92.8% ti nabakunaanen kadagiti estudyante bayat nga 98.55% kadagiti non-teaching personnel ken 99.75% met kadagiti mannursuro iti nagduduma nga kolehiyo ken unibersidad.
Kagiddan iti dayta, dinakamatna a saan pay a maipalubos ti pannakipaset dagiti saan a nabakunaan iti face to face classes ngem mabalinda met nga agnumar iti offline learning wenno dadduma pay a modalities wenno wagas ti panagadal.
