BAGUIO CITY – Iyap-apela manen ti COMELEC-Cordillera ti panagbalin a nasireb dagiti botantes nga agpili kadagiti ibotosda a kanditato iti masungad nga eleksion.
Sigun kenni COMELEC-Cordillera Assistant Regional Election Director Atty. Vanessa Roncal, nasken a sukimaten a nalaing dagiti botantes ti kwalipikasion dagiti kandidato kas ti track records dagitoy.
Impettengna a napateg ti panagbotos ti tunggal indibidual partikular dagiti agtawen iti 18 nga agpangato.
Maibasar iti datus ti ahensia, nasuroken iti maysa a million ti botantes iti Cordillera para iti 2022 National and Local Elections.
Buklen daytoy ti 182,696 a botantes iti Abra; 78,454 iti Apayao; 243,756 iti Benguet; 168,218 iti Baguio City; 134, 428 iti Ifugao; 154,423 iti Kalinga ken 115,925 iti Mountain Province.
