BAGUIO CITY- Iyap-apela ti grupo dagiti babbai manipud kadagiti mining company iti Benguet ti panagbalin a pro-environment dagiti kandidato a mangabak iti May 2022 national and local elections.
Iti naangay a “Cordillera Minera: A Forum on Women and Responsible Mining,” impetteng dagiti lady miners a kasapulanda ti kandidato a mangital-o iti responsible mining ken addaan ti napintas a relasion kadagiti mining companies.
Sigun kenni Philex Mines Cooperative Manager Sandara Ramos, adda dagiti naglabas a kandidato a nangidaulo iti panakadadael dagiti bantay banag a saan a rumbeng a maulit pay babaen iti panangibotos kadagiti kandidato a mangisakit iti aglawlaw.
Sigun met kenni Philex Mining Corporation Community Relations Manager Engineer Marie Dolipas, nasken nga adalen dagiti kandidato a bigbigen ti kontribusion ti mining industry iti panagprogreso ti komunidad ken ti pagilian.
Tarigagay ti Lepanto Consolidate Mining Corporation ken ti Benguet Corporation nga ipangruna dagiti lider ti panggedan ken salun-at dagiti babbai iti komunidad nangruna ta maysa dagitoy naapektaran iti COVID-19 pandemic.
Iti met benneg dagiti small scale mining industry, Loacan-Itogon Pocket Miners, nasken nga isktriktoan dagiti agtugaw a kandidato dagiti linteg ken regulasion iti minining industry imbes a mangipaay dagitoy ti temporario a solusion kas ti temporary permits ken special orders.
