BAGUIO CITY – Mapadpadaananen ti pannakailukat ti Baguio Flower Festival wenno Pangbenga 2017 inton Pebrero Uno.
Sigun kenni Andrew Pinero, ti pannakabagi ti Baguio Flower Festival Foundation Incorporated, iti umuna nga aldaw ti masungad a bulan ket maipatungpal ti opening parade a pasetan dagiti estudiante iti elementaria ditoy siudad.
Kinunana a nabayagen a nakasagana dagiti participants gapu iti nasapa a panagsanay dagitoy.
Malaksid iti dayta, kinunana nga adda metten dagiti nagpalista kadakuada a makisalip iti dua a kategoria iti float parade nga isu ti small float category ken big float category.
Mainaig iti daytoy ket al-allukuyen ni Pinero ti amin nga umili iti siudad a makikaykaysa dagitoy iti backyard gardening a paset ti Panagbenga.
Kinunana nga iti tunggal balay iti amin a barangay ket mabalin a makipaset iti daytoy tapno maital-o ti panagmula iti bukod a paraangan.
