BAGUIO CITY – Mapappapartak ita ti panagbiruk ti City Engineering Office (CEO) ti lokal a gobyerno ti Baguio iti mabalin a pakaikargaan wenno pakaiyakaran dagiti newsstands ditoy siudad.
Kasaruno daytoy ti panagpaso ita nga aldaw ti innem a bulan a katulagan dagiti newsstand vendors ken ti lokal a gobyerno para iti panaglakoda kadagiti sidewalks.
Immuna metten a kiniddaw ti lokal a konseho manipud iti opisina ti mayor ti panakailaylayon ti nasao a katulagan kasaruno ti panagapela dagiti maseknan.
Inaklon ni Vice Mayor Faustino Olowan nga agingga ita ket awan pay ti mabalin a pakaiyakaran dagiti nasao a newsstands ken manarimaan ti panagsukimat ti CEO dagiti lugar a komportable ken mabalin a paglakuan dagiti maseknan a vendors.
Immunan a napagnumuan a maiyakar dagitoy kadagiti uneg dagiti establishimento a nakasagana a mang-akomodar iti panangikabilda ti newsstands.
