Nakanselar ti naituding a panagbisita ti pamilia ni Mary Jane Veloso idiay Indonesia gapu iti maur-uray a pannakayakarna iti sabali a pasilidad kas panagsagana iti panagawidna ditoy Pilipinas.
Iti maysa a statement, kinuna ti pamilia ni Veloso a nakaawatda iti advisory manipud iti Department of Foreign Affairs (DFA) – Office of the Undersecretary for Migration Affairs idi agsapa ti Domingo a saan a matuloy ti planoda a panagbiahe.
Ti pamilia ni Veloso, ti abogadona ken sumagmamano nga opisial ti gobierno ket naituding nga agbiahe idiay Indonesia idi kalman tapno bisitaenda ni Mary Jane sakbay a maiyakar iti Pilipinas.
Kinurmpirmar daytoy ni DFA Undersecretary for Migrant Workers Affairs Eduardo de Vega idi kalman.
Kinunana a nakanselar ti biahe gapu ta awan ti panagbisita iti pagbaludan agsipud ta mayakar ni Veloso manipud Yogjakarta nga agturong idiay Jakarta para iti panagawidna ditoy Pilipinas.
Ni Mary Jane ket maiyakar iti Pilipinas inton Disiembre baente iti agdama a tawen.
Maipalagip nga idi 2010, nakemmeg ni Veloso ken nasentensian ti pammapatay kalpasan a natakuatan ti 2.6 kilograms a heroin a naikabil iti bagahena.
