BAGUIO CITY – Ad-adda pay nga irtengan ti Department of Education (DepEd)-Cordillera ti partnership daytoy kadagiti nagduduma nga ahensia ken institusion tapno maipaayan iti kalidad nga edukasion dagiti estudyante iti baet dagiti karit nga ituntunda ti agdama a pandemya.
Maysa daytoy kadagiti tampok iti agdama nga Education Week Celebration a paspasetan ti DepEd-CAR ken dagiti maseknan nga ahensia ti gobierno.
Addaan daytoy iti tema a “Promoting shared Responsibility on the Delivery of Quality Education to Learners in the Cordilleras”
Impannakel ni DepEd-CAR Regional Director Estella Cariño a tumibtibker pay ti koordinasionda kadagiti nagduduma nga ahensia tapno maiapanamnama ti panakaidanon ti kalidad nga edukasion kadagiti estudyante ditoy rehion nangruna ta manarimaan itan ti pilot run ti limitado a face to face classes iti sumagmamano a pagadalan iti Cordillera.
Kinunana a saan kabaelan ti DepEd a baklayen amin dagiti responsibilidad iti baro a wagas ti panagadal dagiti estundyante.
Gapu iti daytoy, pinagyamananna ti panakitinulong ti CHED, TESDA, DOST-CAR ken dadduma pay nga ahensia ti gobierno tapno marespondean dagiti pakaseknan iti panagadal dagiti estudyante ita ta mapaspasaran paylaeng ti pandemya.
KABAYATANA,
Impanamnama ti Department of Science and Technology (DOST-CAR) iti agtultuloy a panangipaayda iti scholarship programs kadagiti estudyante tapno malag-anan dagitoy iti gastos iti panagadal.
Malaksid iti daytoy, maipaayanda pay iti gundaway tapno ital-o ken bigbigen ti partisipasion ti siyensia iti panagadal dagitoy.
Kabayatan ti Education Week Celebration nga idadauluan ti DepEd-Cordillera, inkari ti DOST ti panakitinnulongda tapno mapasayaat pay ti kalidad ti edukasion iti rehion Cordillera.
Kabayatana, nagkari met ti Schools of Teacher Education and Liberal Arts (STELA) ti Saint Louis University tumulong kadagiti estudyante babaen iti tutorial programs dagitoy.
Sigun kenni Felina Espique, Dean iti STELA department ti nasao a pagadalan, panggep ti proyektoda a mangipatulod kadagiti interns dagitoy nga agserbi kas tutor teachers iti manarimaan a blended ken modular classes.
Kinunana nga agturong dagitoy kadagiti babalay tapno mangidanon iti serbisyo kadagiti agkasapulan nga estudyante. (report ni Bombo Razced Pagoli)
