BAGUIO CITY – Ngimmato ti kaso ti COVID-19 sadiay Bokod, Benguet iti naglabas a duwa a lawas.
Imbinglay ni Mayor Thomas Wales Jr. iti interview ti Bombo Radyo Baguio nga ikonkonsideradan a community transmission dagiti agdama a kasoda iti nasao a sakit.
Sigun kenkuana, posible a kadagiti maisaysayangkat a social gatherings kas iti canão, selebrasyon ti panagkallaysa ken lamay ti pagwarwarasan ti nasao a sakit.
Inlawlawagna a nupay saan a malapdan ti panakaisayangkat dagiti nasao a panagu-urnong ket kanayon met ti panangipalagipda kadagiti umili iti panagtungpal dagitoy kadagiti paglintegan kontra iti COVID-19 malaksid pay iti panangikalikagumda iti panakaisayangkat ti triage, panangipaay ti libre nga face mask ken disinfection.
Innayonna pay a sursurutenda dagiti pammilin ti Benguet Provincial IATF kas iti tallo nga aldaw a panagbayag ti maysa a lamay.
Iti agdama ket dumanon iti 13 ti aktibo a kaso ti COVID-19 sadiay Bokod, Benguet ken dagitoy ket adda kadagiti local quarantine facilities ti munisipyo ken sumagmamano ti naka-home quarantine.
Agtultuloy pay ti isaysayangkatda a contact tracing kadagiti nakapulapol dagiti nagpositibo iti COVID-19 bayat a maur-uray ti resulta ti swab test dagiti naipasidong iti RT-PCR testing.
