BOKOD, BENGUET- Naitabonen ti bangkay ti 74-anyos nga ina a maatap a brutal a pinapatay mismo ti 34-anyos nga anakna idiay Bokod, Benguet.
Iti interview ti Bombo Radyo, kinuna ni Bokod Mayor Erik Donn Ignacio a kas maibasar iti imbestigasyon dagiti awtoridad, Mayo 3, 2026 a nadiskobre ti bagi ti biktima a naikali iti daga, partikular iti arubayanda.
Sigun kadagiti concerned citizen, nakitada a kasla adda ti kalkalyen ti suspek iti daga ken ditoy a nakita ti saka ti biktima.
Iti panagresponde dagiti awtoridad, naduktalan a naikali ti bagi ti biktima, naisina pay ti ulona ken agruprupsan ti bangkay rason a patienda a napasamak ti krimen dua agingga tallo nga aldawen ti napalabas.
Sigun pay kenni Mayor Ignacio, naammoan iti inisyal nga imbestigasyon ti Bokod Municipal Police Station a natagtagbat ti biktima partikular iti likodna gapu iti ado a dara a nakita iti uneg ti pagtaenganda nu sadino posible a pinadas pay daytoy a tumaray.
Naduktalan pay nga awan ti kadwa ti biktima ken suspek iti uneg ti pagtaenganda idi napasamak ti krimen gapu ta dagiti kakabsat ti suspek ket adda iti bukkodda a pamilya bayat a dagiti kaarrubada ket adda iti trabaho.
Iti panagsukimat dagiti awtoridad, naammoanda iti maseknan a pamilya a ti suspek ket addaan iti sakit nga schizophrenia nu sadino dandanina dangran ti amada sangapulo a tawenen ti napalabas rason a simmina ti amada iti pagtaengan.
Naammoan pay a naospital ti suspek iti mental institution iti Baguio City idi 2014 ken nakaruar metlaeng.
Intultuloyna a nagtumtumar ti agas ngem itay laeng nabiit ket insardengna gapu ta sigun kenkuana ket kumapsot ti panagriknana nu agtumar.
Inladawan met ni Mayor Ignacio ti biktima a soft spoken isut gapuna a mabalin a nagdawat iti tulong bayat ti insidente ngem saan a nangngeg dagiti kaarrubada.
Inladawan metlaeng ti Mayor ti suspek a nasingpet ken maysa a mannalon nga iti kinapudnona ket agpaar aramid pay iti bukodna a balay.
Gapu iti daytoy, naklaat metlaeng daytoy kasta metten dagiti umili gapu iti saanda a ninamnama a pagteng.
Naiturongen ti suspek iti prosecutors office ti Provincial Capitol idiay La Trinidad, Benguet para iti umno a proseso.
Sigun kenni Mayor Ignacio, posible a mapilaan daytoy iti kaso a parricide ngem saan pay a maibaga ti konklusion gapu ta ti suspek ket addaan iti sakit.
Iti agdama ket awan pay ti kanayonan nga impormasyon gapu ta incoherent ti suspek.
Kabayatanna, kidkiddawen met ni Mayor Ignacio iti publiko ti pangikararag ken panangipaay iti privacy kadagiti maseknan a pamilya kasta metten iti komunidad tapno makarekoberda manipud iti nasao nga insidente.
Kidkidawenna metlaeng iti publiko a liklikanda ti panangiwaras iti palso a damag a mangitunda iti panagbuteng. //mp4
