BAGUIO CITY- Manamnama ti panagngato ti presyo dagiti sumagmamano a kangrunaan a gagatangen kagiddan ti panagngato met iti presyo dagiti produkto ti petrolyo.
Inaklon daytoy ni Department of Trade & Industry- OIC Regional Director Juliet Lucas iti interview ti Bombo Radyo Baguio.
Sigun kenkuana a gapu daytoy iti nagsasaruno a panagngato ti presyo ti petrolyo kadagiti naglabas nga lawas.
Kinunana nga awan met unay ti panagngato iti presyo dagiti kangrunaan a gagatangen wenno pagkasapulan malaksid kadagiti imported a produkto kas iti gatas, arina kasta met dagiti sumagmamano nga construction materials kas iti steel bars ken semento.
Imbinglayna met a kangrunaan a rason iti ingangato ti presyo a sumurok pay iti Suggested Retai Prices ket ti epekto ti nangato a presyo ti petrolyo isunga maawatanda dagiti manufactures.
Indiayana met ti panaggatang kadagiti asideg iti lokalidad tapnu saan unay a nangina ti presyo dagiti produkto nangruna dagiti agtataud pay kadagiti dadduma nga rehiyon.
Mangnamnama met daytoy iti agbalin nga resulta dagiti maangay a taripnong dagiti maseknan nga ahensia pakairamanan ti DTI tapnu maadal ti umno nga addang ken aksion nga ipatungpalda kas konsiderasyon iti adjustment ti suggested retail prices.
