Agbalbalin a pakaseknan ti barangay Balili, La Trinidad dagiti kable dagiti telecommunications a maikabkabil ken maiwaywayat iti nasao a barangay agsipud ta saan a nakaaramid dagitoya kusto.
Iti panakiuman ti Bombo Radyo kenni Billy Bilango, kapitan ti barangay Balili, La Trinidad, pangpanggependa ti mangbukkel ti ordinansa a mangipaay ti pannusa kadagiti saan a mangbanbantay kadagiti kableda wenno saan a mangiyuryurnos iti kableda.
Sigun kenni Bilango, agbalbalin met a parikot kadagiti telecommunications ti panangipakaammoda iti main officeda ti maipapan kadagiti kable a nakauy-oy.
Iti sabali a bangir, maysa pay a pakaseknan ti nasao a barangay ket dagiti saan a nakatali nga aso.
Gapu iti dayta, impaganetget ni Bilango a rumbeng ti panagbalin a responsible ownership wenno ti panagtungpal iti ordinasa nga “Aso ko, tali mo” tapno maliklikan dagiti kaso ti panakakagat manipud kadagiti aso.
Manamnama met nga inton sumaruno a bulan wenno inton Hunyo ket maipatungpal ti anti-rabies vacinnation sadiay barangay Balili, La Trinidad.//Bombo Mera Pacpacan
