BAGUIO CITY – Dandanin makagudwa ti 66,000 a bilang dagiti baro a botante iti rehion Cordillera a puntirya ti Commission on Elections (COMELEC) a mairehistro para iti 2022 national and local elections.
Gapu iti daytoy, iyap-apela latta ni COMELEC-Cordillera Regional Director Atty. Julius Torres ti panagparehistro dagiti kwalipikado a botante sakbay pay ti deadline inton September 30 tapnu saanda a maurnong iti nasao nga aldaw.
Iti interview ti Bombo Radyo Baguio, kinunana a nasken nga ipakita dagiti umili nga uray ti Cordillera ti addaan kabassitan a populasyon iti pagilian ngem adu ti umili daytoy a kayatda ti agparehistro ken makipaset iti sumaruno nga eleksion.
Imbinglayna nga iti pakasaritaan ti rehion ket idi laeng napalabas nga eleksion a simmurok iti maysa a milyon ti bilang dagiti nagbotos nga umili.
Iti agdama, kinuna ni Atty. Torres nga agtultuloy ti panagparehistro dagiti opisina ti COMELEC iti nagduduma a probinsia ti Cordillera, pakairamanan ti Baguio City malaksid laeng iti Ifugao a naipasidong iti Modified ECQ a rason iti panagrikep dagiti opisina ti COMELEC sadiay.
Dinakamatna a masursurot latta dagiti naipaulog a pagalagadan kontra iti COVID-19 iti panaka-akomodar dagiti agturturong kadagiti opisina ti komisyon tapnu agparehistro, agiyakar ti pagbotosan ken agsukat ti impormasyon iti voter’s record.
