BAGUIO CITY – Ipalpalagip manen dagiti opisyales ti barangay kias ditoy siudad ti baguio ti kanayon a panagridam dagiti agtagikua iti nagduduma a negosyo wenno establishimento iti masakupanda.
Kasaruno daytoy ti napasamak a panagtakaw iti maysa a bagasan sadiay purok 5 ti barangay idi kanikadua a nakapukawan ti nasurok P90,000 a koleksion ti agtagikua.
Sigun kenni kias punong barangay Timothy Pudlao Jr., naalaan iti video ti napasamak babaen iti nakamuntar a CCTV camera sadiay.
Nupay kasta, inaklonna a saan a nabigbig ditoy ti suspek gaputa naka-face mask ken face shield daytoy.
Gapu iti napasamak, irekrekomendarna manen ti panangimuntar dagiti negosyante sadiay iti CCTV camera iti establishimentoda tapnu makatulong no adda man dagiti saan a mapakadaan nga insidente ken maipanamnama ti seguridad ti negosyo dagitoy.
Immuna iti daytoy, nagturong iti istasyon ti bombo radyo baguio ti biktima a negosyante tapnu agpatulong para iti panakapapartak ti imbestigasyon ti kaso.
Sigun kenkuana, nakakabil iti bag ti wallet ken ti nasao a koleksionna ken saanna a nadlaw a naibatina daytoy iti pwesto idi napan iti comfort room.
Dinakamatna a naduktalanna laengen a mapukpukaw ti nasao a bagna idi nagsubli iti pwesto ken kinamatna pay ti suspek ngem nakaluganen daytoy iti maysa a taxi.
Inaklonna a daytoyen ti maikatlo a gundaway a natakawan daytoy.
Kinuna met ti pulisya nga ar-aramidenda ti amin tapnu marisut ti kaso ken mabigbig ti suspek.
Innayonda a nasken met a mintiniren dagiti negosyante ti napintas a kondisyon ti CCTV camera nga inmuntarda iti establishimentoda.
Impalagipda pay ti kanayon a panangidulin dagiti negosyante iti koleksionda tapnu saan a magundawayan dagiti agtatakaw.
