Mabalballaagan ti publiko nga agridam kadagiti nagduduma a klase iti text scam.
Kasaruno daytoy dagiti agwarwaras a kaso iti warrant of arrest text scam nu sadino, ti maysa nga indibidual ket makaawat ti warrant of arrest babaen iti text message ken maatap a singiren iti sender iti partikular a gatad ti kwarta tapno saan a makemmeg.
Iti panakiuman ti Bombo Radyo kenni Police Major Marcy Marron, panakangiwat iti Baguio City Police Office, adda ti nairekord dagitoy a kaso iti nadakamat nga scam idi napan a tawen.
Gapu iti dayta, palpalagipan ti opisyal ti publiko nga ipaberipikarda dagiti warrant of arrest a maaw-awatda kadagiti kameng iti pulisya wenno iti korte.
Malaksid iti dayta, kinuna ni PMaj. Marron nga saanda a rumbeng nga agdanag laketdi ammoda iti bukodda a bagi nga awan ti inaramidda a krimen.
Kaspangarigan addaan dagitoy iti sansangwen a kaso, nasaysayaat latta nga agtalinaed a saanda a patien dagiti maipatpatulod nga warrant of arrest messages tapno saanda a mabiktima iti nasao a modus iti scam.
Mainaig iti dayta, inlawlawag ti nasao a pulis a personal a maiserserbi ti Warrant of Arrest saan a babaen iti text message.
Kabayatanna, maysa metlaeng nga scam ti panagkiddaw iti pang-areglo.//Bombo Jez Lapizar
