Inwaragawag ni Department of Education (DepEd) Secretary Sonny Angara a mabalin a maitantan ti opening class dagiti sumagmamano a pagadalan iti pagilian nu dagitoy ket naapektaran ti habagat wenno typhoon Carina tapno agdalus pay dagitoy.
Sigun kenni Angara, mangiruar daytoy iti listaan dagiti pagadalan a maitantan ti panagrugi ti klaseda ita nga aldaw bayat a dagiti bassit wenno awan ti dadaelna iti bagyo a Carina ken habagat ket mabalin nga ituloyda ti Hulyo 29 kas opening class ti Academic year 2024-2025.
Makikikoordinar metten dagiti regional directors kadagiti principals tapno kitaenda nu nakasaganan dagiti pagadalan para iti klase ngem nu saan dagitoy a nakasagana ket saanda a mapilit.
“Hindi namin pipilitin yung mga nasalanta talaga at mahihirapan sa school opening ng Lunes”
Department of Education Secretary Sonny Angara
Kabayatanna, maibasar iti datos ti Department of Education (DepEd), 90 a pagadalan manipud kadagiti siyam a rehiyon a pakairamanan ti Cordillera Administrative Region, National Capital Region, Region I, Region II, Region III, Region IV-A, Region IV-B, Region VI, ken Region VIII ti naapektaran iti saan a nasayaat a paniempo nu sadino dumanon iti P630 million ti mapatta-patta a gatad a kasapulan para kadagiti reconstruction ken rehabilitation dagitoy.
Agarup 324 met a pagadalan ti maus-usar kas evacuation centers kadagiti innem a rehiyon a buklen ti Cordillera Administrative Region, National Capital Region, Region I, Region III, Region IV-A, and Region VI.
Sumagmamano a paset ti pagilian ti immuna a nangideklara iti state of calamity gapu iti dakkel a panaglayos a napasamak.
