BAGUIO CITY – Inlawlawag ni Barangay Captain Frank Almoza ti Loacan, Itogon, Benguet nu apay a nagsingir ti jeepney driver ti Sitio Labilab iti P140 a plete kadagiti pasaherona.
Daytoy ket kalpasan a sumagmamano a pasahero ti nagreklamo gapu iti nangato a plete iti nasao a ruta.
Sigun kenni Barangay Captain Almoza, maymaysa laeng a lugan ti agbibiahe idiay Sitio Labilab isut gapuna a malugi daytoy nu lima wenno sangapulo laeng ti iluganna nangruna ta saan nga amin a pasahero ket sumang-at iti siudad ti Baguio City.
“Ti sitwasyon ngamin idiay Labilab ket maymaysa nga lugan ti agbibiahe ken saan met nga amin a tao ket agpa-Baguio. Malugi piman suna nu limlima laeng wenno sangapulo ti inluganna. So diyay ti maysa nga intay koma kitaen piman a sitwasyon.”
Kinunana nga iti pannakipagsaritana iti driver ket saan a maisubli ti gastos daytoy iti diesel nangruna ta nangato ti presyo daytoy iti agdama.
Dinayaw met ti nasao nga opisyal dagiti dadduma a pasahero a boluntaryo a nangnayon iti pleteda kas tulongda iti driver.
“Saan piman a masuposopan ti limlima a pasaheros ti krudo isunga boluntaryo piman jay lima nga pasahero nga nagited iti tig-P200 ta limlima da a pasaheros.”
Gapu iti daytoy, kiniddaw ni Almoza ti pannakaawat dagiti commuter iti nasao a sitwasyon nangruna ta adda met ti pamilya ti driver a mangnamnama.
