Manamnama nga inton tawen 2028 ket maisubli ti sigud nga school calendar ti pagilian, ti panagsardeng ti panagadal dagiti estudyante iti bulan ti Marso.
Iti panakiuman ti Bombo Radyo kenni Atty. Ron Perez, PTA Regional Federation President, kinuna nga adda ti pagannurotan a kasapulan a suroten sakbay a maipatungpal ti panagsubli ti sigud nga school calendar.
Sigun kenni Perez, idi napalabas a nasukatan ti school calendar dagiti estudyante ket panggep ti Department of Education a makisabay dagitoy iti daduma a pagadalan sadiay ballasiw-taaw tapno no adda a baksayon dagitoy ket adda met a bakasyon ti pagilian.
No pay kasta, saan a naikonsidera a sabali ti paniempo ti Pilipinas no idilig kadagiti sabali a pagilian no sadino iti agdama, maap-apektaran ti panagadal dagiti estudyante gapu iti kinabara ti panawen.
Ngem, sigun kenni Perez maipatpatungpal ti asynchronous a panagadal kas alternatibo kadagiti face-to-face class.
Kabayatanna, saan a mailibak a ti face-to-face class ladta ti kasayaatan a learning method no idilig kadagiti blended learning gapu ta adda a bumabbaba ti kalidad ti panagadal dagiti estudyante iti daytoy.//M
