BAGUIO CITY – Ituloy ti baro a dadaulo ti Kalinga Police Provincial Office (PPO) a tutukan dagiti nagduduma a kampanya dagitoy tapnu mapagtalinaed ti linak ken kappia sadiay, pakairamanan ti panakasurot dagiti nagduduma a pammilin mainaig iti agdama a pandemya ken iti umadani nga eleksion.
Iti panakiuman ti Bombo Radyo Baguio kenni PCol. Peter Tagtag Jr., baro a dadaulo ti Kalinga PPO, kinunana a tutukanda latta dagiti focus programs ti pulisya ken ti sigud nga anti-criminality campaign dagitoy.
Sigun kenkuana, kangrunaan nga as-asikasuenda ita ti nainget a panangimplementar iti PNP-COMELEC checkpoint.
Nupay kasta, saanda metlaeng a baybay-an ti marijuana eradication operation, operasyon kontra kadagiti drug personalities babaen iti buy-bust ken ti panagbantay dagiti pulis iti nagbeddengan dagiti tribo ti Butbut ken Betwagan tapnu maliklikan a bumara ti tribal conflict dagitoy.
Sigun pay kenni Col. Tagtag Jr., umdas ti pwersa ti Kalinga PPO nga agbantay iti probinsia iti masungad nga eleksion.
Dinakamatna nga iti assessment dagitoy ket awan ti nakaro a political rivalry iti nagbaetan dagiti personalidad a nangipila ti Certificate of Candidacy sadiay.
