BAGUIO CITY – Kinomendaran ti pulisya ti panagtulnog dagiti kaaduan a balay paginuman sadiay La Trinidad, Benguet iti liquor ken curfew ordinances ti nasao a munisipyo.
Sigun kenni Police Major Jeoffer Banglayan, hepe ti La Trinidad Municipal Police Station, awan pay dagiti naiparikep a balay-paginuman iti munisipyo ita a tawen gapu iti panaglabsing dagitoy kadagiti nasao nga ordinansa.
Nupay kasta, kinunana a nainget latta ti panagrikosda kadagiti nagduduma a balay paginuman sadiay tapnu sukimatenda no adda dagiti menor de edad a nakastrek kadagitoy kalpasan ti naituding a curfew.
Dinakamatna nga addan dagiti sumagmamano a babassit a balay-paginuman a binallaagan ken impaayanda ti Notice of Violations gapu iti nagduduma a panaglabsing dagitoy.
Irekrekomandarda met laeng ti kaadda dagiti security guards kadagiti balay-paginuman tapnu adda ti dagus nga aganawa no adda dagiti tumaok a riribok iti establishimento.
Maipalagip nga iti ordinansa ti La Trinidad ket tallo ti klasipikasyon dagiti balay paginuman sadiay.
Nailanad nga amin a naklasipikar iti Class A ket agrikep iti alas-dos ti parbangon baya dagiti Class B ket agrikep iti alas-dose ti tengngat rabii ken dagiti Class C ket agrikep ti alas-nuebe ti rabii. -report from Bombo Jorton Campana.
