Agtultuloy paylaeng ti panagrally dagiti rinibribu nga Israeli idiay Tel Aviv Israel iti tarigagay dagitoy nga ikkaten iti takem ti agdama a Prime Minister a ni Benjamin Netanyahu.
Iti panakiuman ti Bombo Radyo kenni Rex Marcelo Merino, ti Bombo International News Correspondent manipod Israel, kontrolado ti mapaspasamak a rally sadiay nu sadino, addaan ti designated area para iti panakaipatungpal dagitoy.
Malaksid iti dayta,agtultuloy latta met ti panagbantay dagiti kapulisan ken kameng ti daduma pay a maseknan nga ahensya.
Sigun kenni Merino, Israeli metlaeng ti kaadwan kadagiti agralrally ken awan ti Pilipino a makipaspaset iti daytoy.
Kagiddan ti tarigagay dagiti raliyista a panangpaikkat kenni Netanyahu kas prime minister, kidkiddawenda metlaeng ti ceasefire para iti panakawaya-waya amin dagiti agarup 120 nga Israeli nga agtaltalinaed a kawtibo ti Hamas.
Iti baet dayta, pinasingkedan ni Prime Minister Netanyahu a “partial ceasefire” laeng ti umannugutan daytoy, a kayatna a saw-en, saan a mamimpingsan a sumardeng ti gubat.
Sititibker ti desisyon ni Netanyahu iti panggepna a sapasap a panangpukaw kadagiti miembro ti militante a grupo nga Hamas.//Bombo Rob Dominguez
