Sumagmamano a kandidato ken volunteers ti nangbaklasen kadagiti tarpaulins wenno campaign materialsda iti aglawlaw iti siudad ti Baguio ken probinsya ti Benguet.
Maibasar iti Fair Elections Act ti Commission on Elections, naipaayan dagiti kandidato, nangabak man wenno saan a kasapulan nga ikkatenda dagiti campaign materialsda iti las-od ti lima nga aldaw kalpasan ti eleksyon.
Daytoy ket pakairamanan dagiti pablaak dagiti kandidato iti social media nga agkamkampanya.
Nasken a kalpasan ti lima nga aldaw ket awanen dagiti posters a nakapaklat gapu ta mabalin a mapilaan iti panaglabsing dagiti saan a sumurot iti nasao a pammilin.
Sumagmamano metten a campaign materials kadagiti naituding a common poster area ket naikkaten.
Kabayatanna, kiddaw dagiti barangay officials iti siudad ti kooperasyon ken panakitinnulong dagiti kandidato para iti panakabaklas dagiti campaign materials.
Iti immunan a panakiuman ti Bombo Radyo kenni Councilor Rocky Aliping, ABC President iti siudad, kinunana a no anya iti gagar dagiti kandidato a nangipaklat kadagiti postersda ket isu met ti kinaalibtakda iti panang-ikkatda kadagiti posters dagitoy.
Nupay kasta, agbalbalin a pakaseknan kadagitoy no kasano a madispose dagiti tarpaulis nangruna ket mabaybayadan ti tunngal kilo a basura iti siudad a maiturturong sadiay Urdaneta./
