BAGUIO CITY – Dumanon laengen iti 5.68% kadagiti personnel ti Benguet Provincial Police Office (PPO) ti saan pay a nabakunaan kontra iti COVID-19.
Iti interview ti Bombo Radyo Baguio, dinakamat ni PLt.Col. Dominga Terrado, dadaulo ti Provincial Community Affairs Development Unit ti Benguet PPO a manipod iti 1,022 a bilang dagiti pulis iti Benguet ket 58 laengen dagiti saan pay a nabakunaan kontra iti coronavirus.
Inlawlawagna a dagiti saan pay a naipaayan ti bakuna ket dagiti agdadagsen wenno adda rikriknaenda kabayatan ti vaccination rollout.
Nupay kasta, kinunana a 100% ti acceptance rate ti COVID-19 vaccine kadagiti pulis iti Benguet isut gapu a manamnama a makaawat metlaeng dagiti nabatbati iti nasao a bakuna iti kanito a mabalindan a maipaayan iti daytoy.
