BAGUIO CITY – Ipalpalagip manen ti mayor ti La Trinidad, Benguet ti agtultuloy a panakaimplementar ti “No wearing of slipper, short pant and sando policy” para kadagiti porters ken packers iti La Trinidad Vegetable Trading Post.
Sigun kenni Mayor Romeo Salda, maipatpatungpal ti nasao a polisiya tapnu maprotektaran ti mismo a bagi wenno salun-at dagiti porters ken packers kabayatan iti panagtrabaho dagitoy.
Kinunana a naobserabaran nga adu dagiti masugsugatan ken madangdangran a porters wenno packers no madalapos ken maatalan ti kariton ti saka dagitoy gaputa naka-tsinelas ken naka-shortpant laeng dagitoy.
Irekrekomendar metlaeng ni mayor a malaksid iti sapatos ket agaramat dagiti packers ken porters ti botas nga adayo a nataltalged no iti tsinelas.
Dinakamat pay ni Mayor Salda nga adun dagiti natiliw gapu iti pananglabsing iti nasao a polisiya a maipatpatungpal iti uneg ti trading post.
Ibalbalakadna metlaeng ti panagtungpal dagiti dadduma pai nga stakeholders iti nasao a polisiya para metlaeng iti proteksion dagitoy.
Maipalagip a nangrugi ti implementasyon ti “No wearing of slipper, short pant and sando policy” iti La Trinidad Vegetable Trading Post idi napalabas a bulan ken mamulta iti P500 dagiti aglabsing iti daytoy wenno saan ket maipasidongda iti community service.
