BAGUIO CITY – Kidkiddawen ni Mayor Mauricio Domogan ti dagus a panangisayangkat dagiti barangay officials ditoy siudad ti Baguio iti profiling kadagiti sigud ken baro a residente iti masakupanda a barangay.
Sigun kenkuana, agserbi daytoy a paset ti nainget nga addang ti gobyerno kontra iti kinaranggas ken posible nga aktibidad ti terorismo ditoy siudad siudad.
Impettengna a napateg ti panaka-ala ti profile dagiti ganganaet, dagiti Muslim ken uray pay dagiti estudyante nga agab-abang kadagiti nagduduma a barangay.
Inlawlawagna a nasken nga adda iti database ti amin a barangay kadagiti amin a residente daytoy tapnu maliklikan ti panakapasamak dagiti nagduduma a kita ti kinadakes wenno kinaranggas.
Dinakamatna a nagwaras itan iti pagillian dagiti kameng ken sympathizers ti Islamic State of Iraq and Syria (ISIS) ken posible met a makadanunda iti norte ken ditoy siudad ti Baguio.
Innayonna a nasken nga am-amuen dagiti bumarangay no asino dagiti kaarubada ken ammuenda no ania iti trabaho wenno aktibidad dagitoy.
Inyunay-unay pay ti mayor a kasapulan ti panakikaykaysa dagiti umili iti pulisia ken iti lokal a gobyerno ti Baguio tapnu agtalinaed ti linak ken kapia iti intero a siudad ti saleng.
